Ég hef átt heima í Reykjavík síðustu ár eftir að hafa alist upp á landsbyggðinni. Samt hef ég ekki enn vanist hraðanum sem viðgengst í borginni.

Er ég aumingi vegna þess að ég vil keyra innanbæjar á max 70 km hraða? Það virðist vera því ég fæ stingandi augnaráð frá fólki sem þeytist framúr á 90-100. 

Er það eðlilegt í þungri umferð að keyra á 90 km hraða á tveggja akreina umferðaæð? Það má ekkert gerast hjá bílnum á undan til þess að hörð aftanákeyrsla verði staðreynd. 

Að mínu mati er umferðahraðinn í Reykjavík allt of mikill. 

Hvað veldur?

Margar ástæður eru fyrir hendi en að mínu mati mætti kenna mislægum gatnamótum um.

Gera menn sér grein fyrir að frá Shellsjoppunni á Akureyri til Grensásvegar í Reykjavík eru engin umferðaljós?
Hringtorg hjá Byko á Akureyri.
Hringtorg á Blönduósi.
Hringtorg hjá Hvalfjarðagöngunum.
Guð má vita hversu mörg hringtorg eru í Mosó.
Mislæg gatnamót hjá golfvellinum í Grafarholti.
Mislæg gatnamót hjá Höfðunum
Mislæg gatnamót Miklubraut-Skeiðarvogur.
Og loks umferðaljós.

Þetta var smá útúrdúr en hvað gera mislæg gatnamót? 

1. Þau flytja álagspunktana. Ef þú setur mislæg á gatnamót A-B þá flytjast álagspunktarnir á gatnamót A-C. Þar myndast tappi þar sem öll umferðin kemur í einni stórri bylgju. Segjum að í staðinn fyrir öll þessi mislægu gatnamót þá væru umferðaljós, svipað og á Miklubraut-Kringlumýrabraut, væri þá þessi umferðatappi á gatnamótunum Lönguhlíð-Miklubraut? Ég efast stórlega um það.
2. Byggingarland minnkar. Það vantar byggingarland í Reykjavík. Mislæg gatnamót taka mikið pláss og hvað þurfti að gera þegar hið viðurstyggilega skipulagsslys sem gatnamót Hringbraut-Bústaðarvegur var sett á skipulag? Jú, taka eignarnám til þess að rýma fyrir steypuklump. Og það meira að segja forljótum.
3. Hraðinn eykst. Það virðist sem krafan er að geta keyrt frá heimili sínu (A) til vinnu (B) án þess að lenda á rauðu ljósi. Mislæg gatnamót eru vissulega kostur ef þetta er ætlunin en hraðinn eykst í kjölfarið. Ef það eru engin (eða fá) umferðaljós til þess að hægja á ferðinni þá er að sjálfsögðu óhjákvæmilegt að hraðinn eykst. Það þarf engan vísindamann til þess að segja manni það.
   

Þarna er meginpunkturinn. Með aukinni bílaeign þá er bara óhjákvæmilegt að það taki tíma að komast í vinnuna. Þegar byrjað var á mislægum gatnamótum þá held ég að það hafi ekki verið hugsað til enda. Því að þegar var byrjað þá verður að búa til fleiri því það er aðeins verið að færa tappana. Fleiri mislæg gatnamót = meiri hraði = fleiri slys.

Betra hefði verið að fjölga akreinum og halda ljósunum. Með góðri stillingu á ljósum er vel hægt að koma því fyrir að ef keyrt er á 60-70 þá er hægt að keyra helstu umferðaræðarnar án þess að lenda á rauðu. Maður væri lengur að komast í og úr vinnu en ég veit það ekki, mitt mottó er að komast á áfangastað heill á húfi. Ekki á sem skemmstum tíma. 

	Fjórir fluttir á sjúkrahús eftir árekstur á Miklubraut
Ábyrgðarmaður færslu Tilkynna um óviðeigandi tengingu við frétt

Geir H. Haarde fór mikinn í kvöldfréttum sjónvarps og sendi byrgjum og smásölu tóninn. Ástæðan? Jú, hann er hræddur um að þeir hirði hluta af lækkun skatta sem á að taka í gildi 1. mars næstkomandi.

Nú spyr ég, hvers vegna mega byrgjar og co ekki hirða ágóðann? Er það allt í einu orðið ólöglegt að hækka álagningu á vörum og þjónustu? Hver segir að við neytendur eigum endilega á hagnast á þessu? Á maður bara að kaupa allt sem blessaður Geir segir okkur?

Ó nei. Ég er hinn dæmigerði neytandi. Versla kannski í matvörubúðum fyrir um það bil 20.000 á mánuði. Myndi ég vilja að þessi upphæð myndi lækka um einhver prósent? Auðvitað. Hef ég einhvern rétt á því að krefjast þess að byrgjar og co taki ekki til sín einhvern hluta af þessum pening? 

Eini rétturinn sem ég hef er að mótmæla og það er eitthvað sem við Íslendingar erum ömurleg í. Við höfum gott skammtímaminni en langtímaminnið er önnur saga. Við tuðum í tvær vikur og höldum svo áfram að versla þar sem við erum vön.

Hvar liggur þá hundurinn grafinn? Jú, Geir, Árni og félagar eiga auðvitað að hafa svona hluti á hreinu. Það eru ótal leiðir færar í skattalækkunum. Ef samskonar upphæð hefði til dæmis verið varin í að lækka komandi nefskatt þá hefði peningurinn skilað sér miklu betur til okkar. 

Ég er nú langt í frá einhver hagfræðingur en ég hef heilbrigða skynsemi í vopnabúrinu. Ef ríkisstjórnin hefði haft vott af henni þá væri þessi umræða óþörf. Auðvitað vill ríkisstjórnin hafa upphæðirnar sem sýnilegastar; það eru jú kosningar í nánd. Lækkun á nefskatti er ekki nógu sexí. Hins vegar tel ég nokkuð öruggt að þessar aðgerðir skila sér ekki allar til Gunnars og Guggu.  Jón og Jóhannes munu hins vegar hagnast og ég mun ekki gera neitt í því.

Það versta er að Geir, Árni og hinir leppalúðarnir geta heldur ekkert gert þrátt fyrir hótanir.

Ósanngjarnt? Kannski.

Fyrirsjáanlegt? Auðvitað.